"Ne nuk do të ishim në gjendje të kundërvepronim ndaj kërcënimeve gjithnjë në rritje dhe më të sofistikuara me të cilat përballemi si Aleancë pa kontributin e shërbimeve të inteligjencës Aleate", tha Sekretari i Përgjithshëm, duke shtuar se "Inteligjenca ka një rol kritik për të luajtur në informimin e planeve tona të mbrojtjes, rritjen e ndërgjegjësimit për aftësitë e kundërshtarëve tanë dhe vazhdimin e ndihmës sonë për Ukrainën".

Ndërkohë, Asistenti i Sekretarit të Përgjithshëm, z. Scot Bray, në profilin e tij zyrtar i cilësoi këto si takime shumë të rëndësishme për të thelluar punën tonë të përbashkët. Në mënyrë të veçantë ai thekson se: “Misioni ynë është i qartë: t'i japim përparësi vendimmarrjes në Aleancën tonë në të gjithë spektrin e sfidave me të cilat përballemi për të bërë të mundur që vlerat tona dhe 1 miliard njerëzve tanë të jenë të siguruara në një botë me kërcënime në rritje.”

Seria e takimeve pati diskutime strategjike midis Aleatëve mbi çështjet kryesore të inteligjencës, ndërkohë që diskutime u zhvilluan edhe me partnerë të vlefshëm të NATO-s. Tematika e agjendës së takimeve përfshiu luftën e paligjshme të Rusisë në Ukrainë, marrëdhëniet e Moskës me Kinën, Korenë e Veriut, Bjellorusinë dhe Iranin, të ardhmen e inteligjencës së NATO-s, integrimi i teknologjive në zhvillim dhe atyre shkatërruese si dhe tema të tjera me interes.

“Konflikti në Ukrainë tregon qartë se siguria jonë nuk është rajonale, por globale, dhe kjo nënvizon rëndësinë e inteligjencës”, theksoi Sekretari i Përgjithshëm Mark Rutte. “Aleatët e NATO-s nuk kanë ndarë kurrë inteligjencë më shpejt, më fuqishëm dhe mbi një gamë më të gjerë temash sesa tani!”

Kryetari i Komitetit Ushtarak të NATO-s, Admirali Giuseppe Cavo Dragone nënvizoi se çdo ditë, Aleatët e NATO-s janë të ndërgjegjshëm se përballen me kërcënime gjithnjë e më shumëdimensionale. Admirali theksoi se “Jam vazhdimisht i impresionuar nga thellësia, gjerësia dhe cilësia e inteligjencës së NATO-s. E gjitha kjo ka ndikim dhe rëndësi për Komitetin Ushtarak, udhëheqësit tanë dhe stafin tonë në mënyrë që të mund të lundrojmë në mjedisin tonë aktual të sigurisë.”

Takimet vjetore i bashkojnë Aleatët për të diskutuar politikën, strategjinë dhe planifikimin e inteligjencës, me qëllim forcimin e mbështetjes për planifikimin, operacionet dhe vendimmarrjen e Aleancës. Përveç takimeve plenare vjetore në Bruksel, çdo komitet takohet rregullisht gjatë gjithë vitit. Për vitin 2025, Komitetin e Inteligjencës Civile, në emër të Shqipërisë e kryesoi Shërbimi Informativ i Shtetit. Gjatë këtij viti kryesimi nga SHISH, janë marrë vendime shumë të rëndësishme dhe është shënuar progres në angazhimin dhe kontributin e shërbimeve të inteligjencës civile të vendeve aleate në mbështetje të vendimmarrjes strategjike të NATO-s.